Balak4

Pasaylua

pasaylua ko akong mga higala
maglisod gyud ko ug himo ug isturya
salapid na akong dila ug hunahuna
kay natakdan na sa akong amo nga walanghiya....

pasaylua ko ninyo kay ako panagsa ra mupaka
kay kining akong baba puno ni ug mantika

    - Jeffrey Nique, New York



Maayo man lagi mobalak
Bisan ug wala mag-inom ug alak
Na hala kaon ug todo dinha
Bilini pod mi sa imong gikaaon nga maruya.

    - Zen Acaba, Australia


Ang Saging Sa Bansalan

Ang saging sa Bansalan
Lisod gyod malabwan
Tubo sa umahan
Giayo ug atiman

Lung-aga ang sab-a
Maruyaa ang kardaba
Bisag unsang lutoa
Segurado busog ka

Ang saging nga binangay
Lami kaonon sa kanunay
Ang saging nga senyorita
Gamatiting pero pwerteng tam-isa

Ang saging nga morado
Humot ug bus-ok kaayo
Ang saging nga tundan
Tambal kuno sa gibutdan.

Hinog nga saging
Maruyain na natin
Mahirap ang rhyming
Kinahanglan ng Tagalugin.

    - Edwin Bibera, California


Buntis daw si Jane!
(false alarm diay)

kining sobrang kainit
makasamot sa kuto kuto manguhit
suka diri suka didtu
mga pasahero sa tren de na makapaniudto

kay giluod sa dalang pangulihad
sa nangawas nga nagkadaiyang fruit salad
gikan na sad ko sa elmhurst hospital
aron magfollow up sa sakit nga makapa mental

ang hinampak ug nagkayuring nga doctorang bombay
epugos jud nga magpa preggie test aron masuta kung wa bay insik nga gamay.
negative, negative singgit sa techniciang taga Peru
ang ilong daw sa insik nga periko

deep breath, lili, pokpok kuot,
sa akong tiyang mibutod
dala pangagho ug pabulhot
sa utot nga dugay ng gepatayhop

ang ending the same finding
before uli sa balay sa gawas eating
ang insik gibidli sa chinese crispy patang ilaga
didtu sa mexican tacos nagpakaga

maski ang ilong nag aso aso sa kahalang
basta lang makakaon ug bisan unsa na lang.
o pagkakapoy sa akong kahimtang
si mary sa aging sigi na lang kabalibaran

karong gabii mangita sa tambal sa ailment
basig tuob ra diay coke ug dukot ang treatment.
diri ra ko kutob kay mibukal na ang epatuob.....
sa akong manghihilot ice cream ug coke apil epaub-ob.

    - Jane Nique-Velez, New York


Ang Saging ni Herodes

Kung ikaw madam magpatuob
Ang Intsik huwag papasukin sa loob
Tingali madayon ang imong pagkabuntis
Tungod sa tundan ni Herodes.

    - Edu of California


Saging sa mga Praning

Bwhahahahaha
Sa tumang bahakhak
Nalimtan ang sukang hinampak

Daghang salamat Halangdong Edwin
Sa langub nga imong gepuy-an
imo kaming natabangan.

Hala Sabat mo!

O bungotong Haring Herodes
Hadluka ako ayaw
aron dili ako magyawyaw

Madaku siya o magamay
ayaw intawon ako ipalaway
kay dili man na padak-anay
kundili pagilukay!

Nus-a man ka mopanaw tinahud namong Edwin?
Ang saging sa Bansalan ayaw ibilin

Dad- i mi diring mga praning
labina ang mga mareng
nga naghandum sa Saging
sa ilang mga banang poging.

    - Jane Nique-Velez, New York


Bansalenyos, Daghang Salamat

Daghang salamat mga Bansaleno
Sa balak nga maanindot kaayo,
Di iglimod nga kita may talento
Unsay ikasulti nimo, Dr Lino?

Si Jean Metilla naghipi-hipi lang
Gusto mo-apil pero di kaharang
Tanan maka-join ayaw lang ang tigulang
Kay ilang mga balak puerte makakugang.

Nagpaabot ko sa balak ni Serapion
Tingali sa umaabot nga grand reunion
Busa dili gayid kini nato sipyaton
Kay balak niya pulos mabulokon.

Si Zeni ug Gil nga mga Acaba
Sila karon nagpuyo na sa Australia
Misulat ug balak haskang kara-kara
Ikaw gyud magkatawa samtang magbasa.

Si Edwin webmaster medyo nakugang
Sa mga talento kalit nga nadiskubrehan
Ang iyang saging maoy gikagubtan
Kay sa sueldo siya man naumentuhan.

Si Flong nga kabaw usab nanungay
Misagbat pud si nanay nga Lalay
Si Tune sa payag nagpauraray
Samtang nagbasa si Jean nga nagpanghayhay.

Si Imee pud midalikyat sa Espanya
Kauban iyang esposo sa ato pa bana
Kay didto unya maghimo ug bata
Makauban nila'g kaligo damlag sa sapa.

Si Jeffrey Nique naningkamot intawon
Sa mga garay ug pulong nga iyang sulaton
Ug unya sa wala lay ukon-ukon
Nakahuman gyud ug balak usa ka higayon.

Sa mga wala pa kanamo maka-apil
Ning among balak ug mga bingkil-bingkil
Join na mo kahit na hindi n'yo feel
Inom usa kamog baso sa lami nga kinutil.

    - Henry Tacio, Bansalan


Balak Tambal sa Kamingaw

Maayo na lang Lalay ang imong anak ra
Ang natingala sa imong katawa
Ang akong mga kaopisina gayod matingala
Kung si Zenita magkatawa, bisan ug nag-inusara

Ang boss nako moli-li ug mosinyas
Sa akong mga officemate nga nagsulyap
Sa Pilipina nga usahay maghilak
Samtang nagbasa sa inyong mga suwat

Sa opisina, na-anad na gayod sila
Nga kada buntag gayod ako magbasa
Sa mga email gikan sa akong mga higala

Usahay taga-an ko nila ug proyekto
Ingon ko - taymsa ug paghulat mo!!!
Kay na-a pa koy gihimo
Nga balak para sa mga Bansalenyo

Dili gayod sila maka-ik-ik
Motalikod na lang sila ug molakaw morag itik

Kini mga higala akong pasi-aw
Tambal sa akong kamingaw
Sa inyong tanan ako naghanduraw
Nga kitang tanan magkita balang araw.

    - Zenita Acaba, Australia


Kanus-a Pa?

Kanus-a pa man kini mahuman
Kining atong balak nga walay kataposan
Si Edwin sa trabaho wa pa maumentohan
Si Jane sa iyang kabuhi wa pa maulian

Asa na man tong atong maanyag nga abogada
Nga nagsuroy suroy kauban sa iyang bana
Sa espanya nag wara wara
Hinaot nga wa ma sungayi ug baka

Salamat kay human na ang heat wave
Dinhe sa NJ hilabihang kainit
Kining bugan ko nag ping-it
Ang mga buhok nag pilit

Unsa man Inday Zeni
Sa imong trabaho wa ka ba kurati
Basig mafotbol ka wa sabti
Sa imong boss nga morag monkey

Hulat lang taod taod
Kay si Flong sa iyang balak motood
Nangita lang to ug buylo
Human sa iyang paniudto

Dinhe na lang ako kutob
Kay si lola sa ako nag ngurob ngurob
Morag buaya nga tumotokub
Gamay na lang ako sipyat basig bitiis nako ang ma-ub-ob

    - Ann Nique Sabio, New York


Maayong Adlaw, Amigos and Amigas!!!!

Nagsigi gyud ko ug palakpak
Sa kadaghan aning balak
Gikan sa langit, mura ug mga bulak
Sa jardin, isa-isa ug tagaktak.

Tan-awa si Zeny
Nigawas gyud ang arte
Ug kani pud si Jefrrey
Wala pud magpapildi

Kang Lalay, hapit ko kuyapi
Wala ko magdahum, and balak, kusog pa sa tsunami
Pagbali sa hangin
Nakugang ko, sa saging ni Edwin

Pag scroll down nako sa computer
Na surprise ko kang Bobgil
Maayo gyud kay niapil
Abi man nako, siya taksil

Ning hanap na ko ug mata
Pagdoble nako ug basa,
Imee sa Germania, nilupad sa Espanya
Sa atong balak, maayo, kay nagbilin ug isa

Si Jane intawon, nakulangan ug kusog
Sige pud ug panimbasog
Maski ang tuhod ga kurog-kurog
Pasayawon siya, mosayaw gihapon ug irog-irog

Si Tune dili nato kalimtan
Kining atong balak, wala kay kabalak-an
Kung si auntie Dee-dee, mag ngisi-ngisi
Dili lang sa balak, sayaw pud ug watusi

Si Ann, kumidya ug balak
Ang akong tiyan, dili mahiyak
Mag sigi ko ug hagakhak
Akong laway mag watak-watak

Labi na kung si Henry ang mosulat
Ang akong mata mokidlat
Puno ug words, dili mayhap
Mawala ang kagutom, tambal sa kuyap

Walay baling-baling,
Kang Edwin nga saging
Ginamos ug kalamunding
Dream on, no kidding

Naghulat ang akong gisalang
Sa computer ako nag atubang
Sa tanang ninyong balak, ako nag- atang
Bahala na, ning akong make-up kabang

Ingon sa uban, kinahanglan mahubog
Aron ang balak mangisog
Sa Tagalog, "Nasaan ka na irog?"
Ikaw ba ay nalilibog?

Sa pag karon mo bye-bye nako
Ning oras gabii na kaayo
Kang Lalay, nisa-ad gyud ko
Ako tung tubagon ang meeting niadtong Sabado.

    - Florence Dacanay Valeri, New Jersey

KAB-OTA ANG IMONG DAMGO

pugngan ko man ang tanod nga gihigot kanimo
patugpahon ka sa yuta og mutungtong ang akong mga tiil nianang lapad mong pako apan dili mahimo…
nasayod ko babag ang akong kabug’at sa imong paglupad ….

magpabilin na lang ako dinhi sa yuta..sud-ungon

ang imong pagkuyog sa huros sa hangin ..padayon sa paglupad,
kab-ota ang imong mga damgo ..hatagi sa kalipay ang mga bata nga
naghangad kanimo..

ANG KINABUHI NGA BUKIDNON

gikan ning maong bungtod nga diin ako nagtindog
suga sa nangayagkag ug lampara sa mga payag
sa akong panan-aw naghatag kahayag;
wala nay binuhat nga nagtukaw
gawas kanako nga nagpulaw,
nagsud-ong sa kinabuhi nga bukidnon,
ug taliwala ning tanan nagpasalamat sa gihapon
sa Labaw’ng Makagagahom.

mangisdaay

…sa kadlawon..
bisan taliwala sa lalum nga hinanok
sila mobangon gikan sa katulogon…..
moadto sa dagat aron mangayagkag
para ikasula ug ikabaligya..
giantos ang kabugnaw sa tubig
uban sa hinuyohoy sa hangin..
..yamukmok lang ang tan-aw sa katilingban
ngadto nila apan sa kinauyukang
bahin sa ilang kasing-kasing
sila mapasigarbohon nga pinaagi
sa ilang abot ..kita usab nakakaon……

Ang Pakyas kong Gugma – 12-07-2007

    daw gituyo sa kapalaran
    nga mahipatik sa kasaysayan
    ang kaagi ko sa gugma
    ngan kaninyo ipabasa

    dili ko mahikalimtan
    unang adlaw nga ako siyang nakit-an
    diha-diha nabatyagan sa akong dughan
    nga siya lang ang halaran sa gugmang gi
    ampingan.

    hilabihan sa akong kalipay
    sa dihang siya milabay
    daw gibayaw sa langit sa pagdawat ko
    sa hinatag niya nga regalo

    sa iyang sulat gipamulong
    nga siya kanunay kanako naghandom
    usa ka pagbati nga buot niya nga akong
    masayran
    lakip ang tubag sa iyang pangutana nga gusto
    niyang mahibaw-an

    sa among panagkita
    akong gitimbang-timbang sa paghuna-huna
    siya ba angayan
    sa akong gugma hatagan?

    ang tubag sa akong dughan
    siya na lang (kay guwapa man?)
    total labs ko man ang kagwang
    Ingon na lang ko, "your the one"
    that's it , mao na 'to.

    maayo pa sa sinugdan,
    malipayon ang among panag-uban
    halos walay kasudlan
    sa kalipay nga among gisaw-an

    apan sa kalit lang akong nabantayan
    sa iyang batasan,aduna'y kalit nga kausaban
    nahisama na lang ako sa usa ka duwaan,
    human siya nalipay, iya na lang akong gilabay.

    pagkasakit sa akong gibati
    kasakit nga karon ko pa lang nasinati,
    daw pait pa sa paliya
    ang luha nga mitulo sa akong mga mata

    karon ko pa lang nahisayran
    may laing binuhat diay nga gikabuangan
    mura ug gitigbas ang akong dughan
    ug gipikas-pikas sa makadaghan.

    ako siyang gi textsan ug gitawagan sa
    makadaghan
    apan "the number you dialed is either
    unattended or out of coverage
    area" man!

    I ask my self, Bakit, ngano, why"
    wala akoy mahimo, mihilak nalang, mi cry cry.

    nadawat ko ra gyud sa kadugayan
    nga dili di ay siya akong kapalaran
    sakit subli-on ang akong kagahapon
    pero sagdi lang kay tungod adto ako nakakat-on

    mao kini ang ending
    sa na hurt nako nga kasing-kasing
    until here na lang my dear ?????
    so long, farewell!!!!

Ang gugma sa estudyante – 11-24-2012

    Ang kasing-kasing ug huna-huna nagsalimuang, kung mahigugma na gani dili jud mahimutang. Magsige nalang ug huna-huna, daghan ng natingala nganong sige nalang ug tanga.

    Magmatngon kita sa gugma, kay kini muabot ra bisan kanus-a. Kay sa pinakalit, mutuybo ra kini nga wa damha, ug walay petsa ug saktong takna kung kanus-a. Daghang nagbagutbot ug nahasol. niining pagbating di mabasol. Daw usa ka bangkaw, nga lisod ibton kung sa pagbati nabulahan. Naghuna-huna sa mga panghitabo, kung kanus-a ang sunod nilang panagtagbo. Kay niadtong una nilang panagbunggo, anaa na'y gamay'ng pagbating nitubo. Ug gipadako niining modernong panahon karon, nga dali ra ang tubag maangkon. Sa text, chat ug email nga gipangpadala, mga mensaheng haskang pagkadalia.

    Ug mga kasing-kasing nga nagsadya, way adlaw nga di maipakita ang hilabiang pagpangga. Ug gihimo na nga inspirasyon, usa daw sa mga rason nganong ganahan mutuon. Kung dili magkita sa pipila kaadlaw, mga kasing-kasing puno sa kahidlaw. Mag-emote ra ba dayon sa daplin nga way tiaw, hangtod nalang makatagpilaw. Kung ang tawag gani dili tubagon, ang huna-huna dayon madudahon.

    Kung walay mutubag sa cellphone, sa balay o boarding house susihon. Ug didto nahimugso ang mga pagduda, nagsugod na ang tanan ug katingala. Nganong perte namang lagyua? labong sauna perte man unta tong taputa. Ang pinintalang ngislit sa dagway, nahanaw lamang susama sa bangaw. Hangtod ang madungog mao na lamang ang hagawhaw nga tingog. Ug ang ilang gugma nagkasugod na ug kapadlas. ang mga balod sa luha nibanlas ngadto sa baybayon. Kay niabot na jud ang takna ug hinog nga panahon, nga dangaton ang kasakit nga wa gidahom.

Gugma`ng walay sinugdanan ug walay katapusan – 04-04-2010

    Bisan ug mahanaw man ang tanan,
    Apan ikaw kanunay magpabilin sa akong panumduman,
    Ug balonon ko hangtod sa akong kamatayon kining tanan....
    Nga nahimong dayan-dayan sa akong naagian...

    Manghugno man ang kabungtoran,
    Ug muhubas man ang kadagatan,,
    Ug mungiob man ang kalangitan,
    Apan ang GUGMA KO KANIMO, WALAY SINUGDANAN UG WALAY KATAPUSAN..

Balak: Panguma... – 07-12-2008

    Nicolas V. Remonde
    Minglanilla, Cebu

    Ning sayong kabuntagon
    Gipugos niya pagbangon
    Ang lapoy niyang lawas
    Bisan pa sa katigmi sa panahon
    Aron sa pagtikad sa uma
    Kay matod pa nila
    Nagkrisis na kuno kita!
    Singot ni Tatay kalipay ni Nanay
    Si Dodong ug Inday nagtinabangay
    Usa ka pamilya nagminahalay
    Usa ka panig-ingnan
    Modelo sa katilingban
    Pobre apan hamugaway.
    Klase-klaseng lagutmon
    Ilang gipangtanom
    Uban sa nagkadaiyang utanon.
    Mga humay sa basakan
    Sa pikas luna ilang gitamnan
    Labong nga kamaisan
    Mani ug munggos gipataliwad-an.
    Kini ang kinabuhi sa mag-uuma
    Hapo ang lawas sa kainit napagba
    Usahay sa ulan masubhan ug masubawan.
    Sagdi lang basta pangandoy matuman
    Buhong sa pagkaon pamilya ug kaparyentihan
    Ug ang bagang hut-ong sa katilingban.
    Busa atong dasigon ang uban
    Mga bakanteng luna atong patamnan
    Kabulahanan alang sa tanan.
    Kakugi ug pag-ampo gikinahanglan
    Sa krisis nga atong gisagubang
    Lakip ang ubang nasod sa kalibutan.
    Busa ugmara na!
    Alang sa mabungahon tang ugma!

Kung Mag Mugna Man Lang... – 09-28-2007

    Kung mag mugna man lang kog balak,
    kana nalang kabahin sa mga langgam,
    nga tulin ug andam
    Makigbisog sa habagat ug amihan

    O di kaha kabahin sa mga isda
    sa kinalagmang bahin sa dagat,
    ga atang sa pukot
    swerte lang kung makalusot

    Puwede man pod mag mugna
    ug balak kabahin sa hangin
    Nga nagatayhop sa imong aping
    kabugnaw ang mabati mo

    O di kaha kabahin sa uwan
    Nga suki na sa mga mambabalak
    Apan, ang uwan, way kamatayan
    Di mahibaw-an kanusa mo bundak

    Kung mag mugna man lang kog balak,
    kanang di kabahin sa gugma,
    pagbati nga murag kutsilyong giduslak
    sa imong dughan hangtod ang dugo mo uga

    Kung mag mugna man lang kog balak,
    kanang kabahin sa wala
    mas maayong walay padulngan
    lisod iginhawa, kung ikaw mambabalak

    Kung mag mugna man lang kog balak,
    kanang kabahin na lang sa mga damgo
    aron ikatog na lang ko ni ang mga pangandoy
    ug sa buntag na nako kanimo iasoy

ng Kabuntagon – 01-04-2008

    Maoy mihangop kanimo
    ang alimyon sa gininhawa sa kadlawon
    Ang talidhay sa huyohoy miagbay
    Sa imong pagpaso-paso sa kalsada
    Imong nasud-ong ang nagbad-ay
    nga trangka sa inyong balay
    ug ang nahunlak nga lantay
    diin dinhi nimo gipang-ipon
    ang mga damgo sa kagabhion

    Nalantawan mo ang nakanlat nga ang-ang
    sa hagdanan sa balay ni Nong Jing
    Natataw mo ang kadaruhan sa kamaisan
    nga nagpaabot pugsan ug mga singot
    sa kabos uyamot nga agtang

    (Didto sa kasadpan nanglili
    sa nagbungtod nga panganod
    ang nanghuyatid nga kilat
    ug ang kabituonan nanghawid
    sa sidsid sa gilukot nga kangitngit)

    Giduol ka ni Neptune, mikitiwkitiw iyang ikog
    milamano nimo, ug misunod sa imong paglakaw
    hangtod nagkalayo ka gikan
    sa lim-aw sa kahayag sa poste
    ug maoy mipasunding karon
    ang mga imahen
    sa laksot nga kamatuoran

    hutoy sa kawad-on
    ping-it sa kagutom
    tiyabaw sa kapit-os
    agulo sa kapait...aguroyyyy